Први април е ден познат по бројни шеги во сите кругови, а гејмерскиот дефинитивно не е исклучок. За таа цел, во продолжение ќе ви откриеме како вештачката интелигенција може да ги игра вашите омилени игри, како да дојдете до принтер во кој има Titan X графичка карта, да играте со мечки во Pillars of Eternity 2, да си го купите Гералд во када или пак најновата DOOM на флопи дискови.
Nvidia: GeForce GTX G-Assist е вештачка интелигенција која го проучува вашиот стил на играње и го презема играњето кога вие не сакате да продолжите. Неверојатно парче технологија кое звучи премногу добро за да би било вистинито.
IBuyPower: RGB printer е најновиот принтер на IBuyPower и е добар, толку добар да во внатрешноста крие Titan X графичка карта за да излезе во пресрет и на најсложените 4К фотографии! Вистинско, револуционерно чудо кое не можеше, а да не ги остави ниту PC Gamer, ниту Nvidia рамнодушни.
World of Tanks: Mars Mode е целосна конверзија на феноменалната World of Tanks и нуди научно фантастични примеси и феноменални услови за пресметки на црвената планета. Толку е добра да излегува само за супериорната конзолска раса и тоа само во времетраење од еден ден. Поголемо изложување не е за обичните смртници, а и се заканува да го разлути PC малцинството.
Doom: Floppy disks е вистинското решение кое отсекогаш сте го сакале, иако никогаш не сте ни помислиле на него на прво место, но е само за вистинските гејмери, оние кои ја разбираат моќта на флопи дисковите и знаат дека дигиталното преземање воопшто не е кул и дека DOOM не може да биде DOOM ако не се инсталира од 35.550 флопи дискови!
Crusader Kings 2: Mittens е едно од најкрвавите додатоци кои овој историско-веродостоен серијал има добиено – мачки. Точно така, историјата не ја пишуваат поразените. Не ја пишуваат ни победниците. Историјата е напишана од мачките. Дознајте ја тајната која никој не ја знае и поради која толку многу кучиња викаат вау, наместо мјау – Со Crusader Kings 2: Mittens!
Google Maps: Ms. Pac-Man е успешен обид да се патува во времето и да се сервира апсолутно истата шега од порано. Браво Google, нема ништо пооригинално од повторливост.
CD Projekt Red: Tub Geralt е уникатна и ексклузивна фигурина со вашиот и нашиот бестрашен убиец на сè живо и диво. Толку е добра, што во повеќе моменти може да служи како посебно оружје против мракот. Во случај да тоа не помогне, на располагање секогаш го имате врескањето како мало девојче и бегање како луд без глава.
Pillars of Eternity 2: Bear Party DLC е ексклузивен додаток кој за ситни шеесетина долари ви дозволува да навлезете во идната RPG игра како мечка, зад која стои група од други мечки, но вие сте целосно главната и најубавата мечка и воопшто не сте дебели и тоа е само пропаганда на другите мечки кои не се сигурни во нивниот изглед и ја рефлектираат таа несигурност на вас.
Hearthstone: Nadia, Mankrik’s Wife нема да ви најде жена, ниту пак магично да ја замени моментната, но е супер за сите гејмери кои изгубија часови безуспешно барајќи туѓа жена во дигитален ММО свет (WoW фанатиците знаат на што мислиме, а за сите вие што не знаете – блазе си ви!).
Book of Demons: Reversed Mode ви ја покажува страната на демоните и нивната желба да има мир во светот. Ставете им крај на таканаречените вистински херои и пробајте да не се возбудите премногу од звучните ефекти.
Yooka-Laylee: Rap е дефинитивно нешто, но, со желба да сочуваме барем дел од разумот нема ни да се потрудиме да ви објасниме, нема ни да пробаме да вметнеме шега меѓу редовите, не по тие 3:03 минути кои ги изгубивме и никогаш не можеме да ги вратиме.
Arika: Street Fighter EX е боречка игра како ниедна друга и сè што треба да направите за да ја играте е апсолутно ништо, затоа што колку и да изгледа добро играва, сепак е првоаприлска шега и никогаш нема да излезе (brutality and reality double kill).
BlizzCon Textual Attendance ви дозволува да ја искусите магијата на BlizzCоn за нула денари и со 100% имагинација, највеќе затоа што вашиот престој е во текстуална форма, со можност да пристапите кон ова доживување од луксузот на вашиот дом!
Која шега највеќе ви се допадна? Која шега пропуштивме? Кажете нѝ во коментарите!
The post Како помина денот на шегата помеѓу гејмерите? appeared first on IT.mk.