Збор два за сезонската влезница за Deus Ex: Mankind Divided

Deus Ex: Mankind Divided излезе вчера, а видните рецензенти веќе ѝ доделија високи оценки како во поглед на графиката така и во поглед на приказната и гејмплејот. Додека чекаме играта да се отклучи за нашиот регион, од Eidos Montreal веќе нѐ израдуваа со деталите за сезонската влезница.

Влезницата за Deus Ex: Mankind Divided – Season Pass ќе чини 30 евра, а она што ќе добиете за тоа се две мисии кои додатно ќе ги прошират авантурите на Џенсен. Наспроти разлутените верувања на група гејмери кои нема да ја дочекаат веста со раширени раце, авторите ветуваат дека додатоците насловени како “System Rift” и “A Criminal Past” ќе бидат автономни приказни и нема да остават впечаток дека се извлечени од главната кампања.

Останатите дигитални добра се, според нас, од исклучително сомнителен квалитет. Имено, “Assault” и “Tactical” додатоците ви даваат на располагање нови оружја и опрема, а со четирите Praxis Kits инстантно отклучувате нови способности на Jensen. Оние кои се за ваквото предвремено отклучување ќе ги израдува и додатниот „подарок“ од 5000 кредити – виртуелна валута за купување оружја и опрема.

Како последен додаток кој доаѓа со Season Pass добивате 5 “Booster Packs” и 20 “Chipsets” за Deus Ex: Mankind Divided – Breach. За неупатените, Breach е мод сместен во симулација каде хакнувате системи преку прикрадување или адреналинска акција. За разлика од кампањата, модот се одликува со стилизирана графика и малку поразлични способности. Работите кои ги добивате со Season Pass забележително ги олеснуваат, односно забрзуваат излагањата во модот.

Deus Ex: Mankind Divided излегува за Microsoft Windows, PlayStation 4 и Xbox One. Додатокот “System Rift” излегува на есен, а додатокот A Criminal Past” оваа зима. Сѐ останато од додатоците, со оглед на нивната природа, ви е на располагање во моментот кога ќе ја стартувате играта.